政Whats噏:立法會打爛晒 泛民仲要執勤警察登記

20191011
東網電視
更多新聞短片
議員就警員入立法會是否需登記而爭拗。(設計圖片)
立法會大樓近日最少兩度受衝擊搞到爛哂,經過一輪趕工復修後,預計下周三(16日)復會,政府亦會喺當日發表《施政報告》。此前,立法會今日(11日)開內務委員會傾下周安排,建制泛民都乘機要求政務司司長張建宗出席特別內會,回應近日亂象。對於下周三復會安排,唔少民主派議員都擔心警察進入立法會大樓會變成點,其中公民黨郭家麒建議秘書處要為警員登記,不過民建聯何俊賢(高佬賢)就反駁登記會阻礙警察執勤。講真嗰句,如果立法會大樓又被打爛,唔知登記仲有冇用呢?
雖然建制泛民喺內會拗到火花四濺,不過兩邊陣營都覺得,張建宗應就反修例及禁蒙面法風波到立法會解話。好似熱血公民鄭松泰就提到,政府以《緊急法》推行《禁蒙面法》時曾強調,香港並非進入緊急狀態,認為政府講法有矛盾。建制派就覺得,依家有人暴力破壞鐵路等,加上食環署至今仍未有清理違法張貼嘅標語,張建宗應要有統籌和協調能力止暴制亂。內會主席李慧琼就話,會向政府爭取官員出席特別內會。
內會其後討論下周三《施政報告》嘅安排,秘書長陳維安就提到,行管會主席梁君彥已宣布,到時會發出黃色警示,警方或需要喺大樓內候命,強調佢哋只會喺特定地方候勤同戒備。
不過唔少民主派議員都不滿呢個安排,郭家麒話,自己啲議員助理好驚,警方執勤時冇戴委任證,到時有數以百計嘅警員入立法會,令人擔心,建議秘書處先登記核實警員身份。民主黨黃碧雲就建議立法會增聘保安,立法會唔應該再搵招惹麻煩嘅人進入大樓,表明唔接受開會時有警方駐守,又擔心警方會喺大樓施放催淚煙同實彈。
建制派就似乎未驚過,高佬賢就認為,警察每次進入立法會大樓執勤時,都屬於非常緊急嘅情況,如果要求每名警員都要登記,會阻礙警方執法同部署。佢嘅黨友、身兼行管會成員嘅陳克勤就透露行管會將會討論呢件事喎。
此外,議員都好關注特首會唔會用視像方式向立法會發表《施政報告》,陳維安表明,依家冇安排任何視像會議。內會法律顧問馮秀娟就話,《基本法》同《議事規則》都冇清楚訂明發表方式,但《基本法》就列明立法會嘅職能係聽取《施政報告》,但自殖民地時期起,行政首長向立法會發表《施政報告》,都係親身向立法局或立法會讀出,特首應考慮傳統,若改變應諮詢立法會。
除此以外,內會亦已經有共識,如果下周三政府無法撤回修例,將會順延至下一會議,陳維安仲講明到時唔會有辯論同投票添。今次內會咁多嘢拗,傾嚟傾去都未傾完,結果連選內會正副主席都選唔切,下周二將會開九個鐘會議,只係處理選正副主席,唔知到時選唔選到呢?