政Whats噏：邵家臻話坐監受歧視　雞翼細隻啲

因違法佔領行動案而被判囚八個月嘅立法會社福界議員邵家臻，月頭刑滿出獄，當日已見佢明顯清減咗。昨日返到立法會出席財委會同內務委員會會議嘅佢就同記者呻，話自己禍不單行，喺監房冇啖好食，就連雞翼餐嗰隻雞翼，都細過外籍囚友嗰隻。唔通佢喺監倉入面被歧視？

邵家臻話，預咗監房冇啖好食，膳食冇得同出面比，就算揀雞翼餐，外籍囚友嘅雞翼都會明顯大隻啲，坐監已經心情差，依家仲要咁「大細超」，咁仲邊有胃口吖，想唔瘦都難啦，最後搞到佢瘦咗廿幾磅喎。

佢又話自己明顯曬黑咗，不過大家都話佢塊面白過以前，佢就即時拉高衫袖證明，話個肚腩同對「光管腳」都黑埋，依家夠膽著短褲喎，呢八個月做多咗運動，加上監房嘅清淡膳食，佢嘅糖尿病情亦有明顯改善，依家唔使再打糖尿針咁話。