政Whats噏:李華明被翻舊帳 疑教新移民打尖上樓

20191013
東網電視
更多新聞短片
李華明被指教新移民打尖上公屋。(陳嘉順攝)
有論壇今日(13日)討論政府周三(16日)公布的新一份《施政報告》,期間立法會內務委員會前副主席李華明畀台下觀眾翻舊帳,發現佢曾經教新移民打尖上樓。而立法會議員莫乃光就畀理大專業及持續教育學院講師陳偉強挑機,質問佢會唔會成為市民榜樣,帶頭信任警隊。
有市民喺論壇上話,香港要起多啲過渡性房屋,可惜起嚟都唔係畀香港人住,因為日日150個單程證人士嚟香港,搶晒啲公屋。該名市民話,佢記得大約10年前有本書叫《有福同享》,教新移民打尖上公屋,而書上面出現咗一位議員嘅橫額,「好幸運地呢位議員今日就喺我面前」,矛頭直指李華明。
另一方面,陳偉強質問莫乃光會唔會支持警方入立法會執法,佢話依家啲商場都唔信任警方,叫莫身為立法會議員要做榜樣,問佢係咪驚。莫答話真係驚㗎,因為呢4個月嚟,有唔少議員喺街頭畀警員針對,甚至仲拉埋添,所以議員對警方入立法會都好擔心。
陳偉強之前喺學校畀學生包圍,之後學校安排佢停一停教務,佢話理解校方決定。陳又話,人誰無過,身為教育工作者,只要學生知錯,可以畀機會佢哋重回正軌喎。