政Whats噏：畀郭家麒話瞓覺　象哥反稱自己炯炯有神

立法會人力事務委員會今日(17日)開會，話要選新嘅正副主席，點知個會開到一半就開始嘈，事關公民黨立法會議員郭家麒就話提名喺度瞓緊覺嘅民建聯議員黃定光(象哥)做主席，點知象哥聽完即刻頂唔住頸，鬧番佢「黐線」，話自己比郭家麒仲精神，而且炯炯有神添！跟住成個會就演變成罵戰，雙方隔空駁火互鬧。

期間議員梁耀忠主持會議，諗住出聲調停吓，同象哥講咁樣唔係咁好㗎，喺會議入面要尊重對方，點知象哥就話郭家麒話佢瞓覺夠唔係幾好咯！郭聽完就怪番象哥，話佢常態係瞓覺，搞到見佢低頭就以為佢瞓咗，仲建議象哥下次寫個「我不是睡覺」嘅牌提吓大家喎。

正當大家諗住一筆勾銷繼續開會嘅時候，點知郭家麒就再鬧民建聯低劣，結果就搞到民建聯成班議員群起，要求佢收番冒犯性說話，議員蔣麗芸仲激動到拍晒枱，結果成個會大半時間都喺度嘈，唔好話選正副主席嘞！