政Whats噏:黃梓謙探兒童醫院 一個BB公仔三萬蚊

20191018
東網電視
更多新聞短片
黃梓謙揹住個好大嘅醫療袋(左圖),裏面裝嘅全部都係醫療用品(右圖)。(互聯網)
香港兒童醫院籌備10年,終於喺舊年年底啟用,今年3月起都分階段開展住院服務,其他醫院嘅小朋友陸續搬入兒童醫院。兒童事務委員會委員黃梓謙(Gary)日前就同其他委員一齊探訪兒童醫院,佢仲揹埋一個大袋上身,又拎起一個BB,究竟做乜呢?
Gary話去咗醫院入面嘅模擬培訓中心,呢個中心主要訓練醫生同護士服務兒童,佢揹住嗰個就係醫生用嘅大袋,個袋大到遮住咗佢半個身。入面有乜嘢?一打開全部都係醫療用品,Gary話揹上身唔覺好重,但就估唔到可以裝到咁多嘢喎。中心入面仲有非常像真嘅BB公仔畀醫護人員練習,唔講唔知,一個公仔要3萬蚊,Gary都話嚇親。不過,佢都話無論係重量定大細,公仔都同一個初生嬰兒無分別。
兒童醫院仲有好多設施專為小朋友設計,好似平時小朋友好驚做檢查嘅磁力共振機就加咗好多動物圖案上去,等小朋友以為自己只係去咗個夢幻世界玩。Gary覺得兒童醫院嘅出現對基層嘅小朋友嚟講,簡直係五星級酒店,佢話回歸22年政府有好多嘢都做得唔到位,兒童醫院搞咗10年終於有得用,算係咁多衰嘢入面,終於有樣嘢好喇!