政Whats噏：搞唔搞蛇宴　黃國「腦交戰」

各政黨每逢秋冬都會搞吓蛇宴聚會，工聯會屬下工會每年辦蛇宴都舖天蓋地，尤其旺角嘅蛇宴每年都爆場，不過今年就有個別蛇宴可能要延期或取消。工聯會理事長黃國話，由於逢周六同周日部分地區經常發生衝突情況，即使係平日，港鐵都提早收車，有幾場蛇宴已經取消或延期，至於其他蛇宴係咪繼續搞，真係「腦交戰」呀。

黃國話，蛇宴通常喺晚上七點半開始，平日港鐵若提早收車，參加者可能趕唔切搭尾班車；不少周六同周日，個別高危地區全晚都發生衝突事件，影響就更大。由飲食業職工總會喺旺角搞嘅蛇宴，過往都大受歡迎，極難訂位，但受近日亂象影響，明日(21日)及有個別周六周日嘅蛇宴已經取消，即使未取消嘅蛇宴，亦有個別工友都因為擔心安全而取消訂位。

對於其餘蛇宴嘅安排，黃國就話依家「十五十六」緊，好多不確定因素，每日都唔同，又唔知港鐵恢復服務嘅情況係點，煮蛇嘅師傅需要預約一整個蛇季，就算蛇宴開唔成都要畀錢師傅，所以預計工會都會有損失。佢話，依家最希望係亂象盡快完結，社會回復正常。