政Whats噏：建制唔准　鄭松泰撤口頭質詢失敗

立法會議員一向可以喺立法會上提出質詢，不過就需要早作預告。通常議員都會把握機會喺會上向官員提出質詢，不過立法會議員鄭松泰今(23日)喺會上就決定放棄呢個難得嘅機會，不過就因為有建制派議員反對佢撤回質詢，所以最終都係撤唔成。

因為修訂《逃犯條例》觸發社會爭議，立法會大樓亦因大樓遭破壞，所以提早放暑假，本身喺7月份要審議嘅議程亦順延到復會後先可以審議。鄭松泰本身嘅口頭質詢，係關於修例對香港造成嘅經濟影響，不過就因為政府決定撤回修例，所以佢喺會上提出撤回質詢。

不過立法會主席梁君彥就話，如果議員要撤回質詢，需要先睇吓有無議員反對，當時就有幾位建制派議員舉手反對，鄭松泰見狀亦步出會議廳，連問都唔問。質詢撤唔成，雖然鄭步出會議廳，但唔代表條質詢會作廢，最終由在席最資深嘅民建聯李慧琼代為提出質詢，仲追問商務及經濟發展局局長邱騰華會唔會慰問部分機構。不過邱騰華回應話，政府唔會為個別企業制訂措施，仲話相信執法機關會跟進。