政Whats噏：立會設午休小休　泛民又有猜忌

立法會會議今日(23日)罕有地設有1小時午休同半小時小休，令到議員有難得喘氣機會，唔使再開長命會議。不過呢個做法就惹來泛民懷疑，係為阻泛民議員登上主席台主持會議喇。

尋日(22日)立法會秘書處出文件，通知今日會設午膳同小休，而秘書處當時就指，因為內務委員會仲未選出正、副主席，全程會議需要由立法會主席梁君彥一人主持。呢個安排並非常見，所以有議員今日先知有呢個特別安排。

不過，有泛民質疑梁咁辛苦直踩，再罕見地設休息時間，只為阻止會議改由最資深議員暫時主持嘅局面喎。現時議會中最資深議員就係涂謹申，其代表作就係主持審議《逃犯條例》修訂時，竟然出現咗開兩次會共4小時都未選出主席同「鬧雙胞」嘅畫面，所以唔想將個會議交去佢手上，的確有呢個可能性喎。

然而睇返《內務守則》，如果立法會主席同代理主席事前已知未能主持會議，應按程序選舉一名議員任主持，似乎泛民呢個猜測唔成立喇。