政Whats噏：梁美芬頻甩轆讀錯字　闊斧變潑婦

打工仔都需要交稅，所以好關注稅務問題。立法會今日(23日)開會討論《2019年稅務(修訂)(稅務寬免)條例草案》，好多議員爭相發言，但係立法會議員梁美芬就唔知點解頻頻甩轆，仲話人「潑婦」，究竟係邊個激親佢呢？

原來佢只係一時讀錯字，將「大刀闊斧」讀成「大刀潑婦」，並唔係鬧人，但頻頻甩轆就係真嘅。當時佢係講緊希望政府可以更加大刀闊斧，將撥款加碼，用嚟幫助部分唔想拎綜援，反而靠自己努力工作嘅市民，但就口快快，讀錯字，講成「大刀潑婦」。

梁美芬喺短短嘅十幾分鐘嘅發言裏面連環讀錯幾次，講講下綜援，就讀成「津援」，可能本來想講津貼同援助啩。佢跟住形容中產人士好慘，但係就再次讀錯，講成中間最「產」嘅人士，唔知係唔係因為會議時間太長，搞到佢太攰呢？