政Whats噏:謝偉銓出師不利 當選主席首次開會即流會

2019年11月05日 08:52
東網電視
更多新聞短片
發展事務委員會今早開會,因法定人數不足流會。(設計圖片)
立法會發展事務委員會早前選出正、副主席,主席之位就由喺上一屆立法會都出任過呢個委員會主席嘅建築、測量、都市規劃及園境界立法會議員謝偉銓(Tony)失而復得。今日(5日)朝早委員會再次開會,係選出正、副主席之後嘅首次會議,點知就因為會議法定人數不足,最終流會收場。搞成咁,Tony真係可以話係出師不利喇。
委員會原定今日早上8時半開會,發展局局長黃偉綸會就施政報告政策措施進行簡報。惟今日開會時,會議室入面包括作為主席嘅Tony,最高峰都只有11名議員,分別為8名建制派同3名民主派議員,其中民主派嘅陳志全(慢必)同鄭松泰更加喺點算會議法定人數期間就離開會議室。結果點人數法定時間結束,會議室都唔夠法定人數要求嘅12人,Tony惟有宣布流會。雖然議員林健鋒最後都趕到返嚟,但佢進入會議室時Tony已宣布流會,所以都係挽救唔到大局。
Tony事後就話,嘥咗兩小時嘅會議時間好可惜,尤其係委員會早前已因選主席事宜浪費咗一次會議,依家仲要處理大量積壓多時嘅議程。事後有委員就問Tony可否即日重開會議,以及盡量避免喺早上8時半開會。Tony解釋,立法會今日已有多個委員會會議,難以再搵到合適時間同會議室開會,而委員會喺8時半開會亦唔係乜嘢新事物或特別安排,所以都係希望議員今後盡力準時開會喇。
議員趕唔切開會固然唔妥當,但入咗會議室又走咗去又係咩玩法﹖慢必話,就算佢同鄭松泰冇離席,都仍然欠一名議員先夠人,而佢離開會議室係因為不滿建制派壟斷正、副主席,選完主席就退會,如果民主派仲配合去湊人數,就係縱容建制派。另一今日有出席會議嘅民主派議員陳淑莊話,秘書處昨晚(4日)已發短訊提醒議員開會,會議亦邀請咗17名官員出席,批評大部分建制派議員都冇影,就連委員會副主席陸頌雄都缺席。
陸就解釋話佢朝早搭巴士途經西九龍公路,因該處發生交通意外,塞車塞咗20多分鐘,所以遲咗返到。另一缺席議員鄭泳舜就話,因為朝早喺深水埗做緊地區工作,所以趕唔切開會,都覺得唔好意思喎。開會係議員重要職責,如果咁都做唔到,成日遲到甚至冇影,真係應該扣人工喇。