政Whats噏：政府止暴制亂無方　鬼祟閉門授勳

香港呢5個月以來，因為政府修訂《逃犯條例》而令示威及暴力衝突四起，社會立立亂，政府又止暴制亂無方，搞到唔少活動都要取消，唔止早前賽馬活動被迫暫停，十一煙花要取消，依家就連一年一度、政府視為重要活動之一嘅勳銜頒授典禮都好似驚咗班示威者搗亂咁，要改為鬼鬼祟祟咁閉門舉行，認真肉酸又羞家。

行政署今日(8日)下午發新聞公告，話2019年度勳銜頒授典禮明日(9日)會喺香港禮賓府宴會廳舉行，不過鑑於近日嘅社會氣氛，典禮以閉門形式進行喇。至於政府授勳予受勳人士嘅錄影片段同圖片，就會透過政府新聞處發放咁話。

反修例風波已經持續咗5個月，但係呢個政府就對止暴制亂束手無策，本港幾乎日日都有示威、真係「催煙」四起，民間呢幾個月來已經有唔少活動要停辦，依家連授勳典禮都要鬼祟閉門進行，偷偷摸摸咁，真係拎到勳銜都唔光彩喇。