政Whats噏:內會主席仍未選出 泛民拉布擺陳維安上枱

2019年11月08日 21:26
東網電視
更多新聞短片
郭家麒諷刺陳維安是失蹤人士。(設計圖片)
立法會復會將近一個月,但內務委員會就仲係繼續處於膠着狀態,莫講話要選正、副主席,連埋今日(8日)共開咗5次會都仲未進入到選舉答問環節。泛民主派議員繼續喺會上拉布,雖然立法會秘書長陳維安冇出席會議,但唔係度也中槍,繼續被擺上枱。喺會上多次拉布嘅泛民議員郭家麒,仲鬧爆陳維安係失蹤人士添,其後會議仲因為陳而一度暫停。唔知繼陳維安之後,嚟緊仲有咩立法會職員被擺上枱呢?
泛民喺內會上拉布已經唔係新鮮事,喺早幾次嘅會議上,有唔少泛民議員提出行政管理委員會(行管會)嘅事務,因為內會正、副主席係行管會當然成員,唔少議員都未掌握到行管會嘅運作,所以希望陳維安可以出席會議,為議員提供資訊。
內會上,泛民議員陳淑莊就繼續提到陳維安過去都有列席內會特別會議嘅事,之後郭家麒就燒埋立法會主席梁君彥嘅處事手法,認為內會主席有份出任代主席,陳維安應該列席會議,提供有關主席主持大會嘅指引。其後泛民議員許智峯都幫口,認為陳維安缺席會議係不合理,仲提出希望主席可以暫停會議,直到請到陳維安現身先繼續會議。
唔知係咪睇唔過眼,建制派議員張國鈞就形容陳維安係補習老師,覺得唔應該喺答問環節前為所有候選人補習,做法就好似變成立法會訓練班咁,令每個候選人都用同一個答案去回應。佢仲話,冇人預計到答問環節會有咩問題,候選人應該要自己預備好點回應。
不過,泛民議員就覺得唔需要補習,郭家麒仲批評陳係失蹤人士、成日唔肯開工嘅職員。佢認為陳喺憲制上應該要服務議員,有責任喺會上提供足夠資訊,甚至批評建制派包庇陳,令陳主客不分、作威作福缺席會議。負責主持會議嘅郭榮鏗決定暫停會議,仲同陳維安見面,問吓佢出唔出席會議,仲引述陳話因為冇行管會授權,所以唔會出席會議。其實陳都唔係第一次解釋,但無論點解釋,相信都班泛民都唔會聽得入耳喇。