政Whats噏：香港籠罩黑色恐怖　何君堯話可成立民團

早幾日喺街頭遇襲受傷嘅立法會議員何君堯，日前已經出院。佢形容依家黑色恐怖籠罩香港，鑑於目前政府擴大警力有實際困難，為咗保障安全，佢認為可成立受法律規限嘅「民團」。

何君堯接受內地官媒訪問時解釋，佢所講嘅民團類似一種保安組織，按照香港法規、民間力量做一啲保障性工作。佢強調民團唔係自己隨隨便便組織嘅防衞隊，亦唔係可以隨意毆打市民嘅黑社會，民團嘅成員更加似係保安員，可考慮僱用有豐富保安經驗同實力嘅人，而且必須經過警方審核同登記，獲准持有一定嘅器械，同時要防止有暴徒或同情暴徒嘅人混入。

憶述受傷送院時嘅情況，佢話喺救護車上仍然覺得自己情況尚好，唔單止發短訊畀家人報平安，亦寫咗份簡單嘅口供，諗住畀警方，又話太太喺病房見到佢時眼框都紅晒，反而阿仔就問佢身手同反應點解可以咁快。經過呢次事件後，佢話會加倍留意人身安全。