政Whats噏︰示威者多為大學生　葉劉轟校長尸位素餐

呢5個多月以嚟，暴力示威行動不斷，而喺衝突中被捕嘅有唔少係年輕人，當中包括咗大學生同大專生，有說法指香港喺呢場修訂《逃犯條例》風波中損失咗一代人。身兼行政會議成員嘅立法會議員葉劉淑儀(葉劉)直言情況令人震驚，仲話作為納稅人，不禁要問一句，班大學校長咁多年嚟，喺培養學生品格方面到底做過啲乜嘢？點解大學竟然變成暴力嘅溫床？直斥各大學校長係尸位素餐。

喺呢場修例風波當中，可以見到被捕人士中有唔少年輕面孔。早前都報道過，喺修例風波中被捕嘅逾3000人中，有逾700人係大學生同大專生，而喺本地大學當中，香港理工大學最多人被捕、其次係香港中文大學，之後就係香港大學同香港浸會大學。而大部分學生就分別涉非法集結、暴動、縱火、刑事毀壞同襲警等罪。

噚晚(13日)葉劉喺社交網站發貼文，羅列2016至2017年8間資助大學校長薪酬，最低薪係嶺南大學校長鄭國漢，為465萬港元至480萬港元；最高就係時任理大校長唐偉章，達765萬港元至780萬港元，直指大學校長福利薪酬高到令人咋舌，甚至比特首薪金高出1倍或以上。

葉劉又話，一直有傳聞指大學校園內藏有軍火庫，甚至有製造炸彈的工場，但喺呢啲暴力分子壓力下，部分大學校長竟採取姑息態度，協助佢哋阻止警方進入校園執法，仲特別提到呢兩日警方同中大學生喺校園出口2號橋位置發生嘅衝突添！佢認為學校根本冇合法理據阻止警方進入校園執法，但校長就選擇偏袒暴力學生，實屬非常不當咁話。

佢又提到部分人只視大學校長呢個職位為仕途上踏腳石，以港大前校長馬斐森為例，因港大喺世界上躋身前列，故此馬斐森離港後，就可以成功轉職到英國著名嘅愛丁堡大學出任高層喇。不過，佢都認為政府亦係責無旁貸，皆因回顧回歸以來歷任教育局局長，好多均冇學術背景，所以就冇足夠學術地位或知識同大學校長周旋，結果就造成現今放任自流嘅局面喎。今次葉劉一支箭射晒8大校長，但係唔係人人都認同佢所講嘅就唔知喇。