政Whats噏:何君堯譴責林卓廷議案獲批

20191118
東網電視
更多新聞短片
何君堯喺議會中採取行動,對一名泛民議員提出譴責議案。
立法會議員何君堯一向係議會中嘅惹火人物,言行同樣出位,繼早前入稟起訴3名泛民議員誹謗,今次又喺議會中採取行動,對其中一名泛民議員提出譴責議案。
立法會會議議程中已經有兩項針對何君堯嘅譴責議案,分別係基於7月21日喺元朗西鐵站嘅事件,以及何曾經喺立法會中形容女議員「食慣洋腸」。不過佢就作出反擊,用番同一招對泛民議員提出譴責議案,就係對住同樣喺7月21日出現喺元朗嘅議員林卓廷囉。
何君堯認為林行為不檢,煽惑群眾參與非法集會、打鬥或暴動,仲依據影片編製時序表,形容林卓廷有4次挑釁行動。佢所編嘅時序表非常詳盡,列出影片時間同形容內容,中英對照,連有途人講粗口都引述埋,中文就以粗口拼音「DLLM」、「DL」去代表,但英文就原句「Fxxk You」咁寫,單係呢個準備工作已經睇得出佢嘅毅力。
而何君堯呢份譴責議案獲議員容海恩、姚思榮同潘兆平聯署,亦都已經獲得立法會主席梁君彥批准,載列喺周三(20日)立法會會議嘅議程上。不過,現時會議有大量議程積壓,幾時開始到審議都未知喇。