政Whats噏：邵家輝玩「案件重演」　澄清會議上無爆粗

口快快講錯嘢成日都有，但畀人聽咗做粗口就唔係幾好喇！立法會議員批發及零售界議員邵家輝前日(2日)喺一個委員會會議上就疑似爆粗。對於政府官員選擇性引用數據，嚟游說議員全面禁售加熱煙，邵家輝講咗句：「X你點解讀啲又唔讀啲嘅呢？」不過邵今日(4日)就話自己無講粗口，而係將「點解你」講得太快，冤枉啊大人！

邵話唔明點解「點解你」會變咗做「X你」，仲即場案件重演，對住立法會議員林卓廷係咁示範。林卓廷又跟住邵一齊讀「點解你」，發現點聽都唔似粗口。林又笑邵「一X成名」，邵就話自己份人好低調㗎啫。

連路過嘅會計界議員梁繼昌都幫邵家輝平反，話好少聽到邵講粗囗。林卓廷都認同：「輝哥好斯文㗎嘛。」林又話喺公開場合冇聽過邵講粗口，但私下就唔知啦。