政Whats噏:線上遊戲打漢奸 黎智英等成通緝犯

2019年12月06日 16:27
東網電視
更多新聞短片
內地有遊戲聲稱要「打漢奸」,疑似影射黎智英、李柱銘、黃之鋒等人。(設計圖片)
香港亂局持續咗近6個月,仲未見到靜止嘅迹象,唔少市民都已厭倦呢個狀況。內地近日就有全新嘅線上遊戲推出,名為《全民打漢奸》,背景同內容都與香港息息相關,直指要搵出「漢奸」,而當中嘅「漢奸」就以周不時都去外國「唱衰香港」嘅「漢奸黎」壹傳媒黎智英、民主黨(白鴿黨)創黨主席李柱銘(李漢奸)、香港眾志秘書長黃之鋒等作為原型,似乎唔少人都心中有氣,想向佢哋發泄喎。
遊戲一開始就寫明「香港是中國的香港,不容外部勢力染指」,開宗明義反對港獨同外國勢力。而遊戲背景係港人常見嘅道路、垃圾桶、藥房、交通燈等,與過去嘅示威場景相似,而路上仲有大量黑衣人行走,部分更頭戴黃色頭盔,玩家可選擇以手、棒球棍同拖鞋追打黑衣人。
遊戲又講明入面有多名「漢奸」遭到通緝,玩家要搵出「漢奸」去守護香港。遊戲中嘅「漢奸」大家都耳熟能詳,曾被官媒點名為「禍港四人幫」嘅漢奸黎、李漢奸、「民主阿婆」前政務司司長陳方安生,及外號「AV仁」嘅白鴿黨前主席何俊仁統統有份成為遊戲嘅原型,其餘嘅「漢奸」原型仲有香港眾志秘書長黃之鋒、常委羅冠聰,同民間人權陣線召集人岑子杰。
遊戲形容「肥佬黎」為亂港金主、毒蘋果同提款機,仲係香港「貳傳媒主席」,利用旗下媒體歪曲真相,實為非法活動支持者、策劃者同組織者,而「肥佬黎」就同「AV仁」坐喺糖水鋪,令人勾起當日光復元朗中,漢奸黎同AV仁喺又新街食甜品嘅畫面。而遊戲中嘅「陳四萬」就被形容為民主阿婆、係港英餘孽,身為前特區政府政務司司長,滿口仁義道德但打民主幌子領導反對派,收受「肥佬黎」政治黑金去反中亂港。「陳四萬」仲要坐住紙飛機、手持「I Love USA(我愛美國)」嘅手袋。
另一遊戲角色「李漢奸」就係港獨之父、殖民走狗,將佢畫成一隻狗咁搖尾乞憐,而以往經常被嘲似河童嘅黃之鋒,就喺遊戲中被稱呼及畫作「河童」,又被形容為港獨頭目、提線木偶。至於「羅冠鬆」就與美國駐港人員密會,煽動學生罷課自己就靜靜雞走去美國讀書,真係一睇就知係影射羅冠聰。
遊戲入面詳細介紹每個「漢奸」,又配合真實造型設計畫像,真係一啲都唔求其。不過當然都係多得遊戲角色嘅原型出賣香港到人所共知,先可以令遊戲咁入型入格啫。