政Whats噏：何君堯自認抗日防衞官　誓決一死戰

因為言論惹火，立法會議員何君堯早前被英國母校取消名譽博士學位，繼而喺屯門擺街站時又遇襲，上月更連任區議員失敗，但可幸嘅係中國政法大學頒授一個名譽博士學位畀佢。遇到連番挫折，何君堯日前喺官媒節目中就形容自己係當年抗日防衞官。點解呢？

何君堯話自己就好似盧溝橋事變同日軍決一死戰嘅防衞官，佢話呢個士兵其實好孤單，企喺戰線最前端，但無做逃兵，企硬，無論日軍用咩理由都唔可以闖入。何又話：「君堯只是做一個不要逃跑的士兵，談不上甚麼偉大，我就是做我分內的事情！」

至於畀扮其支持者嘅人行刺，何話當時其實都好驚訝，除咗有可能命仔都無，仲擔心法治以後都無法保障無辜嘅人。何話傷勢已經好番晒啦，留底一條L形嘅傷疤，佢就話呢個代表「Love」，係「愛的記號」啊！