政Whats噏：議員圍插聶德權　狠批態度懶懶閒

喺過去半年，香港示威不斷，政府處理反修例風波手法被各方指摘。多名議員今日(16日)喺立法會政制事務委員會上批評政府未能規管網上大量嘅假新聞，又指政府喺宣傳《基本法》同憲法不力先係更核心嘅問題，兼且批評區議會選舉揭視現有選舉程序中多項問題，而經歷區選大敗嘅建制派更將怒火指向政制及內地事務局局長聶德權，狠批政府態度懶懶閒！

多名議員喺會上指市民對《基本法》認識唔全面，以至喺理解一國兩制上出現偏差。金融服務界張華峰直言，多年嚟政府推廣《基本法》都只係用搞展覽等古老方法，反問政府仲有冇新嘅宣傳方式？議員何君堯就指政府推動憲法教育不力，仲提到現屆政府喺競選時話會喺教育方面多撥50億港元，問政府會否就憲法同《基本法》獨立成科？

聶德權就回應話政制局要識得善用網絡，而過去半年事件更凸顯社交媒體嘅重要性，仲話其實局方用咗2100萬港元喺宣傳上添！至於教育方面，佢指基本法督導委員會透過唔同小組推廣《基本法》，但當被追問到喺教育上有乜嘢具體措施時，佢就話要等小組入面嘅專家再諗下點樣再做好推廣喎。

另一議員梁美芬就關注過去半年喺網上大量流傳嘅假新聞，仲舉例話呢幾個月示威活動中已經死左2500人，仲要用到英文拍片講到似層層咁。聶德權回應話政府過去有針對住呢啲網上假消息已主動作出澄清，仲講到話會加強執法。

亦有建制派議員提到今屆區選，話有選民喺領取選票時發現自己「被投票」，無故被剝奪投票權，更大鬧政府仲遲遲未落實電子投票好似石器時代咁落後喎。聶徳權就重申局方會按區選經驗作出建議，特別喺領取選票過程上作改善，但就話其實歷屆選舉都有重複選票問題，更指今屆只有98宗，同200幾萬投咗票嘅選民比只係小數目添！

不過，聶徳權呢番說話就引嚟議員陳恒鑌嘅追擊，佢指摘局方回應唔夠積極，並反指呢啲個案一單都嫌多，仲會令人質疑選舉可信性，又繼續大鬧政府一直冇正面回應議員提出嘅建議，反問政府嘅態度係咪要繼續咁懶懶閒？聶徳權就為自己畀咗議員懶懶閒嘅錯覺感到抱歉，仲講到話實情唔係咁喎，不過之後佢嘅發言都只係講返局方將會喺3方面努力。