政Whats噏：譚香文借$400畀「街坊」應急　對方去如黃鶴

害人之心不可有，防人之心不可無。黃大仙龍星選區議員譚香文今(6日)喺社交平台發文，話自己早前一個唔小心，被騙徒呃咗400蚊啦。事後，譚香文話自己本街坊之情，借錢畀騙徒，點知後來錢到手後去如黃鶴，所以告知其他市民小心被騙，唔好輕易上當。

譚香文喺Facebook發文，話上星期六(4日)，一位男子到區議員辦事處求助，表示住喺龍蟠苑，因外出倒垃圾不慎被大風吹關大門，但銀包、手機都漏低咗喺屋，但同日下晝要返工要交通費搭車，又要搵自己細佬拎屋企鎖匙，咁譚香文見佢可憐，就借咗400蚊，點知原來係騙案，最後該名男子冇返去辦事處，而譚香文亦都話可能根本就唔係街坊。

其後我哋打畀譚香文，佢話自己唔會為咗400蚊報警，但自己都係第一次遇到騙案，亦都後悔當時冇謹慎小心，同時感嘆香港經濟太差，有人會連開飯嘅錢都唔夠，搞到去行騙，最後，佢呼籲大家以後都要小心騙案呀！