政Whats噏：區諾軒范國威搬離立會　動議亦被DQ

喺早前選舉呈請案中被法庭裁定當選無效，最終被取消立法會議席(DQ)嘅區諾軒同范國威(Gary)，最遲要喺今日(6日)搬離立法會大樓嘅辦事處。佢哋早前已執拾大樓辦公室內嘅物品，不過佢哋就唔止要執包袱走人，就連佢哋原本喺周三(8日)立法會大會提出嘅動議都被DQ埋喇。

立法會大會周三復會，《逃犯條例》修訂觸發嘅示威浪潮已經持續半年，多名立法會議員就修例風波發生嘅事宜喺大會提出十多項議案。原本Gary同區諾軒都有份提出，不過立法會秘書今日已通知議員，由於佢哋兩個已經唔再係立法會議員，因此周三大會嘅議員議案中，佢哋二人分別提出嘅兩項議案都唔可以動議喇。

為咗可以善用議會時間同避免議論重複，立法會主席梁君彥決定將十多項議案分為五項合併辯論。呢五項合併辯論分別係舊年6月12日立法會外示威事件、7月21日西鐵元朗站襲擊事件、8月31日港鐵太子站襲擊事件、警方對待示威者同現場執行職務人士方式，以及修例引發社會衝突或騷亂嘅前因後果。