政Whats噏：安撫年輕人？鄉議局倡向大學畢業生派3萬蚊

政府一直都被批評唔聽年輕人意見，未有做好青年工作，年輕人難以向上流，樓價高企又買唔到樓，好似見唔到希望咁，最近社會動蕩，唔少年輕人都上街示威遊行。鄉議局十多名成員今日(10日)去政府總部同財政司司長陳茂波會面，就財政預算案畀建議，其中就提出向應屆大學畢業生派錢。唔通佢哋覺得派錢就可以令年輕人唔上街，幫到現時局勢降溫﹖

鄉議局今日同陳茂波會面後就見傳媒，話近來香港受到內外負面因素打擊，經濟唔太樂觀，形容為「驚濤駭浪、迎難而上」。佢哋仲話，嚟緊應屆大學畢業生應有8至9萬人，認為財政預算案可以畀佢哋資助，提供3萬港元現金津貼。聽落好似好筍，原來只係向繼續升學或創業自僱，有持續發展嘅先可獲得3萬港元資助，都話冇咁大隻蛤蜊隨街跳㗎啦。

此外，鄉議局亦建議豁免6條新界隧道收費，試行一年，估計涉款23億港元，同埋促請政府發展新界鄉郊深度旅遊及開放沙頭角禁區等。