政Whats噏:唔使再做無殼蝸牛 陳梓維覓得臨時議辦

2020年01月12日 15:50
東網電視
更多新聞短片
陳梓維搵到嘅臨時議辦(右圖)只有一張摺枱同兩張摺櫈,其招牌仍然係手寫。
唔使再做無殼蝸牛嘞!區會新丁、油尖旺區議員陳梓維唔使再喺Food Court(美食廣場)同街頭接見市民,事關佢已喺區內覓得臨時辦事處,而且喺尋日(11日)已經低調開張。佢話有瓦遮頭好好多,但遲啲都係要再搬嘅,所以議辦簡略就得,唔會擺太多嘢。
陳梓維尋日喺Facebook上載咗議辦嘅門口相,又貼文話有業主願意短租畀佢做臨時議辦,覺得好感動。問佢短租幾耐同租金幾多?佢話合約關係唔方便透露,但租金係合理嘅。相中所見,臨時議辦只有一張摺枱同兩張摺櫈,而呢個Post(貼文)出街後惹嚟好多網友留言,個別網友問佢議辦有乜需要?有網友話唔好浪費,建議佢喺網上搵免費嘅物資,而佢亦回應話「我都經常上網排免費物品」。
外界對佢印象深刻,其中一樣就係佢手寫嘅政綱,而佢臨時議辦嘅招牌亦係手寫嘅。有網友就問:「點解仲係手寫字,用電腦Print(打印)啦!」但亦有網民留言話:「佢依手字迹最真誠,係選民最愛。」我哋亦問佢係咪想貫徹佢過往嘅作風?佢話其實喺諗住做連儂牆喎。