政Whats噏：懲教百年慶典　紀律部隊一門三傑齊到賀

懲教署為慶祝踏入一百周年，今日(12日)就喺中環大館舉行慶祝活動兼嘉年華，紀律部隊一門三傑，即警務處處長鄧炳強、海關關長鄧以海及入境處處長曾國衞亦前來恭賀懲教署署長胡英明，認真畀面。

今次活動以「懲教一百載　智慧創未來」為題，唔講唔知，原來香港嘅監獄制度早喺1841年創立，由當時嘅香港總裁判官同時負責管理警隊及監獄。

而當時香港只有一所中央監獄，即域多利監獄。直至1920年，域多利監獄脫離警隊，改由獨立部門監獄署管理，其後於1982年易名為懲教署。唔怪得警隊同懲教署咁有淵源啦。

今次大會除透過舞蹈表演，講述懲教工作過去100年嘅蛻變，由以前着重安全羈管，發展到今日懲教並重，積極推動更生同社區教育工作，仲發展埋智慧監獄添。