政Whats噏：港大未決定戴耀廷去留　被批效率低

喺2014年長達79日嘅違法佔領行動(佔中)，港大法律系副教授戴耀廷係佔中發起人之一，包括有立法會議員在內嘅政界人士都曾要求港大炒咗佢，而港大「探討充分解僱理由委員會」本月內正式討論應否革除戴嘅教席，幾個港大師生組織搶先出嚟幫佢護航。有時事評論員就批評港大依家先討論戴嘅去留係辦事效率太低，直指港大有心為學生好就應該一早炒咗佢，否則只會整衰百年老校嘅名譽。

喺舊年4月，戴耀廷被法庭裁定串謀作出公眾妨擾及煽惑他人作出公眾妨擾兩罪成立，被判監16個月，其後戴與同案另外被裁定罪成嘅8人均向上訴庭提出上訴，而佢喺監獄服刑約4個月後，獲批准保釋外出等候上訴。

港大校友關注組、港大教師及職員會同港大學生會評議會大學事務委員會今日(14日)召開記者會，港大校友關注組副召集人麥東榮話，探討充分解僱理由委員會本月內會正式討論應否革除戴耀廷嘅教席，因為佢嘅案件仲處於上訴階段，法庭隨時會撤銷控罪，所以港大唔應該喺未完成上訴程序前，就進行任何內部紀律聆訊甚至革職，否則會違反程序公義。

港大校務委員李梓成就話炒戴要過三關，第一關嘅港大「探討充分解僱理由委員會」只係用嚟確認係咪喺佢完成上訴程序前，啟動內部審理解僱程序，之後仲有教務委員會同校務委員會兩關，但就認為點都唔應該革走戴喎。該等組織仲話今日會喺愛丁堡廣場舉行集會，抗議佢未完成上訴，有關委員會就展開內部審訊。

對於港大終於展開討論戴耀廷炒魷嘅問題，時事評論員陳雲生批評港大太遲行動，明明佔中係5、6年前嘅事，點解「搞咁咗多風波，依家先嚟講？」作為聞名國際嘅百年大學，港大早就有能力判斷戴嘅去留，拖咁耐只會整衰自己嗰名。

陳雲生又話雖然戴嘅上訴程序仍然進行緊，但佢嘅行為爭議過大，加上當年佢喺台上高呼「佔領中環，現在開始」嘅一刻已成事實，港大應該一早終止佢嘅教席，「港大如果識炒一啲行為影響緊幾個至10個人嘅教職員，咁戴佔中影響咗香港700萬人，點解仲留喺度？」

港大發言人今日回應傳媒時話校方處理大學成員嘅人事事宜，一向都有嚴謹公正嘅既定內部程序，會根據港大條例同其他相關規條跟進個案，但由於過程涉及機密資料，校方唔會就事件作任何評論。

相信打工仔都知公司有心炒人可以好快，但係港大拖咗幾年都炒唔到一個戴耀廷，真係好少見，難怪會令外界產生咁多質疑。