政Whats噏:內會停擺搞唔掂 農曆年後加會16個鐘

2020年01月14日 13:18
東網電視
更多新聞短片
內務委員會長時間未能選出正副主席。
立法會內務委員會至今已經開咗12次會議,但仍然未選出正副主席,停擺超過兩個月,唔少已經完成首讀嘅法案工作受到影響。日前勞工及福利局局長羅致光仲「先斬後奏」,意圖將涉及增加4周產假嘅條例草案繞過內務委員會,交付人力事務委員會處理,內會停擺咁耐咩都做唔到,上個立法年度擔任內會主席嘅李慧琼今日(14日)就建議,話嚟緊2月要加開4場特別會議,合共16個鐘處理問題喎。
因為內會遲遲未選出主席,羅致光之前就擔心延長產假法案交付內會處理,會喺今屆會期完結前都未能通過,有關法案就要推倒重來,所以上星期就喺立法會大會動議將涉及增加4周產假嘅《僱傭條例(修訂)草案》繞過內會,轉交由人力事務委員會審議,但動議最後就因流會而未能表決,唔知聽日(15日)大會又過唔過到關呢?
但內會方面就通知議員,話有意喺2月加開特別會議選正副主席,分別喺2月5日下午、6日全日及8日上午,合共16個鐘,徵詢吓議員係咪能夠出席有關會議,如果日期同時間一旦落‍實,秘書處會再通知,但喺泛民不斷拉布情況下,就算加開會議,到時又唔知係咪真係可以選到正副主席呢?