政Whats噏：民主派聯署致函梁君彥　促駁回羅致光增產假動議

勞工及福利局局長羅致光上周四(9日)喺立法會動議將《2019年僱傭(修訂)條例草案》，涉及增加四周產假嘅條例二讀辯論中止待續後，繞過內務委員會，轉交人力事務委員會審議，獲主席梁君彥批准，早前泛民主派議員已經講明唔支持呢個做法，動議最後仲因流會而未能表決，將於聽日(15日)大會繼續討論，而今日(14日)民主派議員仲聯署致函主席梁君彥，要求收回批准動議的裁決添。

民主派議員當時就要求澄清動議內容兩大重點，包括事務委員會未可代替法案委員會，同埋如何根據《議事規則》第54(5)條恢復二讀，否則就難以展開辯論，擔心破壞議事規則咁話。

民主派續指，動議違反《議事規則》係鐵一般嘅事實，所以聯署致函梁君彥，要求收回批准動議的裁決，但如果佢一意孤行，都要釐清並以書面形式交代動議下法案如何恢復二讀喎，仲要請法律顧問確認動議如何符合《議事規則》等一系列法律觀點。