政Whats噏:油尖旺區會狙擊打卡黨 搞着雙料議員

2020年01月14日 18:50
東網電視
更多新聞短片
往年油尖旺區議員只要出席1分鐘都可視為出席。
民主派喺全港17個區議會取得話事權,隨住各區議會開始召開會議,唔少區議會都通過一啲改革方案,例如取消授權票同增選委員,或者成立新嘅小組委員會。油尖旺區議會今日(14日)開會,就通過咗議員必須出席1小時或多於50%嘅會議時間先計出席率,不過呢個新措施就可能令同為立法會議員嘅區議員分身不暇。
油尖旺區議會余德寶(Andy)今日喺Facebook發文,指內務會議同第二次區議會大會已經通過並生效,今屆議員必須出席1小時或多於50%嘅會議時間先計出席率。相比以往只要出席1分鐘都可以當出席咗,新措施無疑係打擊啲淨係嚟打卡唔開會嘅議員,難怪Andy都形容為撥亂反正喇!
不過呢個做法可能會搞到同路人,事關民主派立法會議員涂謹申(阿涂)都係油尖旺區議員。雖然暫時油尖旺區議會都係喺星期二開會,照計唔會同星期三四嘅立法會大會同續會撞時間,之不過立法會同區議會都仲有其他小組委員會會議,阿涂分分鐘分身不暇,咁搞法又係咪捉蟲呢?