政Whats噏︰被指持美國護照　鼠王芬食花生拍片再反擊

立法會議員梁美芬(鼠王芬)早前被質疑有美國國籍，有人更發起聯署要求注銷其美國國籍。雖然鼠王芬早前已經喺社交平台發長文反擊，澄清佢根本冇美國國籍，不過唔知係咪仍然心有戚戚然，定係怕有關方面誤會其心志，今日(15日)佢就喺網上再度出擊，發放咗段短片再度回應事件，片中嘅佢仲一路回應網友提問，一路食花生添。

片段中鼠王芬一邊伸手入罐去拎花生，一邊睇住手機中網友嘅問題。佢就話有網友問佢有冇「買金着草」，佢就答︰「我廿幾歲就開始買金㗎喇喎。」之後又有人問佢家屬有冇美國護照，佢就回應︰「總之我一家四口都係中國人啦。」

鼠王芬答完兩條問題之後，就話︰「盒花生食晒㗎喇喎。」而片中可見罐花生確係所剩無幾。查實鼠王芬段片只係得嗰50秒，但啲花生就咁快食晒，究竟係罐花生一早畀人食咗大半，定係鼠王芬拍片NG多到要食晒罐花生先拍完，就得佢自己先知喇。