政Whats噏:逾期入工務小組 肥尹被寸冇影要解釋

2020年01月15日 15:57
東網電視
更多新聞短片
肥尹逾期加入委員會,被建制派議員玩番轉頭。
民主黨立法會議員尹兆堅(肥尹)日前去信立法會工務小組委員會主席盧偉國,話要申請逾期加入小組,今日(15日)工務小組開會,首項議程就係審議係咪批准肥尹加入。不過身為主角嘅肥尹就冇影,未有出席會議。違法佔領行動期間,建制派申請逾期加入委員會時曾被民主派玩嘢阻撓,今日多名建制派議員就「玩」返轉頭,話肥尹應出席會議解釋加入原因,又話議員要準時開會先得,暗寸肥尹唔準時,最後肥尹嘅申請就要押後處理喇。
工務小組處理肥尹申請時,作為小組委員嘅民建聯周浩鼎(Holden)就話,有議員想加入參與審理固然係好事,但就好奇肥尹點解嚟到本屆立法會屆尾先話加入,想聽吓肥尹解釋。議員梁志祥亦都附和黨友Holden,話如果肥尹本人喺度會好啲,最低限度係有乜疑問都可以畀佢回應,但就強調絕對唔反對肥尹加入,仲會掉轉支持,只係覺得肥尹在場討論吓好啲。在場嘅工聯會勞工界議員陸頌雄就冇咁客氣,寸爆肥尹話雖然支持有同事加入,但都要準時開會先得,又話申請加入嘅人都仲未返到立法會,希望對方可以解釋吓,建議下次會議先處理。
見到肥尹被圍攻,民主派議員都幫肥尹護航,其中陳志全就話逾期加入委員會嘅情況以往都處理唔少,要求申請人出席答問嘅情況亦曾試過,過去都有申請者係等大家批准後先正式加入嚟開會,認為如果肥尹知道有人提問,都一定會出席,希望唔好因為人哋冇嚟開會或未出現,就認為人哋唔尊重委員會,或者誠意不足咁話。
咁究竟肥尹點解唔出席會議呢﹖佢就話因為早上有訪問,要去講述政府紓困措施事宜,而且自己未係委員會成員,一般情況都係申請獲批後先需計算出席,佢亦估唔到有建制派議員會質詢佢參與委員會原因,形容同慣例不符喎,依家惟有等下次會議列席答辯喇。其實去年10月,肥尹黨友、議員許智峯(峯鴿)申請亦都申請逾期加入工務小組,當時峯鴿亦都被建制派攔路,要求佢詳細解釋原因,可謂前車可鑑。肥尹咁都唔醒目嚴陣以待,真係畀人寸都抵喇。不過說到底,呢啲都係民主派之前自己種下嘅惡果啫。