政Whats噏:毛孟靜話關心孕婦 容海恩批得個講字

2020年01月15日 17:54
東網電視
更多新聞短片
Eunice希望泛民體恤懷孕婦女嘅需要。
立法會大會今日(15日)晏晝開會,繼續審議係咪將有關增加產假嘅僱傭條例修訂草案,繞過內務委員會,直接交由人力事務委員會審議,期間議員容海恩(Eunice)表示贊成有關動議,佢提到,如果泛民主派議員有心幫婦女或者勞工界,就應該畀條例通過,如果今年處理唔到,下屆就要重新嚟過。
Eunice直斥泛民主派唔好口口聲聲話幫婦女,仲特別點名批評毛孟靜關心孕婦得個講字,四十幾歲嘅Eunice將為兩個小朋友嘅母親,雖然高齡懷孕,但自爆兩年後仍有可能計劃再生,認為唔應該畀泛民拖垮條例,繼而剝削第時有機會生育嘅婦女享受嘅福利同權利。
Eunice又話拖延審議條例嘅話,係影響緊未來有意生育嘅婦女權益,而今次修訂條例內容其實唔算多,但佢強調非常重要,包括法定產假延長4星期、延長產假需要畀嘅薪酬設立上限、縮短流產定義入面嘅懷孕期,同埋到診證明書等,希望泛民能夠體恤懷孕婦女嘅需要。
而為防泛民主派突襲否決動議,建制派認為條例唔能夠再拖延,亦特別留守立法會開會,因而缺席中聯辦嘅新春酒會。