政Whats噏：政府推劏房租管　張炳良稱難度係點界定

政府日前提出多項民生政策措施，包括會研究推行「劏房」租務管制，以及進一步增加過渡性房屋。運輸及房屋局前局長張炳良今日(15日)出席一個大學研討會時提到，不同於引入「印花稅」時能夠由政府主導，訂立租務管制必須經由立法會通過方能生效，認為難度在於如何界定何謂「劏房單位」。

張炳良指，由於只有劏房單位會被納入作租務管制，但「劏房」本身並未有法律定義，因此政府擬訂草案時，最大難度係如何喺法律上定義何謂「劏房」，劏房業主會想盡辦法鑽法律漏洞，而且喺立法會審議時必會有議員反問點解唔係所有單位？佢又引現屆政府上任時提出要引入嘅「物業空置稅」為例，指草案至今兩年幾仲未落實，因為仍然卡咗喺立法會。

至於過渡性房屋，張炳良指其實政府自2010年起已有研究，但上屆政府一直並無額外嘅閒置土地，因此並無落實。佢指出，雖然現屆政府指未來3年會推出1萬個過渡性房屋單位，但現時劏房住戶有近9萬個，希望政府可以做得更多。