政Whats噏:大罵郭榮鏗助拉布 周浩鼎激到噴口水

2020年01月16日 18:26
東網電視
更多新聞短片
周浩鼎左側衣領位置有好大滴口水(紅圈示)。
內務委員會停擺數月,議員周浩鼎今日(16日)喺立法會會議發言,期間話要同市民解釋內會唔可以停止運作,點知周浩鼎愈講愈激動,點名大鬧議員郭榮鏗利用內會主持嘅權力,阻撓選舉正副主席,仲怒斥反對派與產婦為敵,最後激動到噴口水,令事件演變成真正嘅「口水戰」添!
周浩鼎開會嘅時候呼籲市民睇清楚反對派嘅真面目,從詳細解釋內會停擺嘅理由,講到郭榮鏗用盡內會主持嘅力量,非常厚顏咁喺內會開會嘅時候畀全部人發言,實質就係冠冕堂皇去呃人,配合反對派拉布,阻止內會進行,搞到內會唔可以成立法案委員會審議延長產假等草案。周發言期間,愈講愈激動,七情上面不在話下,可能後尾太激氣,連一大滴口水都噴埋出嚟,演變成真正嘅「口水大戰」,現場口沫橫飛,但佢本人就似乎注意唔到喎。
點知周咁猛烈嘅攻勢都阻止唔到郭榮鏗,郭發言期間仲要鬧埋立法會主席梁君彥,話梁飯又冇得食、廁所又冇得去,因為佢嗰班豬一般嘅建制隊友唔夠勤力去開會,仲話只要在任主席李慧琼加開特別會議,就算由夜晚8點開到朝早8點,星期六日開埋會,佢都奉陪到底喎。立法會被稱為「口水會」就大家都知道啦,但希望議員們都注意個人衞生,唔好真係噴口水啦!