政Whats噏:邵家臻好教唔教 計劃出書講解坐監準備

2020年01月16日 18:34
東網電視
更多新聞短片
邵家臻出書講喺獄中嘅心路歷程。(陳亦瀅攝)
立法會社會福利界議員邵家臻一向熱愛寫作,過往亦都寫過唔少書,早前喺坐監期間都有寫作,仲輯錄成書添!過往佢都有寫過關於囚權嘅書,嚟緊都可能會再繼續寫同監獄有關嘅書,但就唔係講監獄生活,而係打算講吓坐監前有乜嘢準備?好教唔教,竟然教人坐監!
邵家臻早前因為違法佔領行動案而被判囚8個月,當時佢喺赤柱監獄服刑期間,仲趁有時間寫低心路歷程,其後會將寫好嘅篇幅寄去啲民主派議員嘅辦事處,再轉交畀佢嘅助理整理。佢仲話喺坐監期間都有囚友向佢講吓監獄嘅情況,但去到後期就有啲囚友因為咁而被搜倉。
新書叫乜名?佢話過往嘅著作都鍾意玩吓食字,本身構思新書個名叫「赤柱磨成書」,但感覺坐監歷程比較特別,所以今次就用番最直白嘅書名《坐監記》。佢話本書唔止有自己嘅心路歷程,仲有一啲監獄內嘅小資料、囚友嘅故事,同埋出獄後嘅感受。
過往佢有部分著作都入唔到監獄,估計今次新書都未必入到。至於未來方面,佢就話因為眼見有被捕人士未有坐監準備,所以計劃出書講吓,包括心理準備、物資、規則等等。