你要知:大掃除搞到周身傷? 打掃初哥最高危

2020年01月17日 04:00
東網電視
更多新聞短片
很多人全年唔做家務,一做便出事,原來大有原因。
年近歲晚,人人都會趁機除舊迎新,大掃除是指定動作。不過,很多人全年唔做家務,一做便弄得五勞七傷,腰痠背痛膝頭傷。物理治療師提醒,做家務與做運動一樣,事前要拉筋和按摩,一旦出現輕微疼痛感時,就應即時自救,而非「唔理佢」。
以為大掃除後只是肌肉痠痛咁簡單?有人就因新年前抹窗,手肘突然痛得動彈不得,要立即就醫及打類固醇針,手肘才可正常伸展。註冊物理治療師劉兆安解釋,很多人因動作過大、過勞、長時間郁動造成身體勞損、甚至平日沒有做家務習慣,突然做很多家務,導致身體無法適應而弄傷。「其實好多嘢有預防就冇事,只係一次過做太多、做唔慣、傷咗仲要繼續做,咁就出事!」
萬一不幸做家務時身體各處出現疼痛,就要留意傷患位置狀況。如果是紅腫發熱,便要休息和敷冰;如果只是痛楚輕微,則可以按摩患處,也可以利用暖手包,暖敷患處數個小時。他又提供一個小貼士,「如果摸落患處好㷫,就用冰敷;如果唔㷫又冇紅腫發熱,就用熱敷。」
病向淺中醫,身體的痛處同樣不應以為會自行痊愈而不加理會,要及早按摩紓緩痛楚。按摩方法有很多種,物理治療師劉兆安為準備大掃除的人推薦四種按摩小工具,趕走痠痛。小工具包括有:網球、長遮、滾球造型按摩器及滾輪按摩器。網球可用作令背部的肌肉放鬆,或者用滾輪按摩器鬆一鬆手腕、手肘和膊頭的筋和肌肉。而如果膝頭兩邊感到繃緊的話,則可用滾球造型的按摩器「碌吓佢」。至於肩膀「好緊」,可用長遮手柄較尖的位置,定點按壓上斜方肌疼痛位置,「壓一至兩秒,放鬆,再壓」,不用太多力便可以有助放鬆肩膀肌肉。
做家務時的正確姿勢同樣重要,例如提重物時應量力而為,雙手取重物時,兩邊力量要平衡,如果要單邊提重物的話則要定時換手,太重便應用手推車。抹窗時應多換手,避免同一隻手重複動作。扭毛巾時可換方向扭乾,也可以選用較薄的毛巾,戴上手套的話會容易扭乾又能避免受傷。而在執拾櫃桶或抹地板時,要避免「踎」或跪,應坐在矮櫈上,以免傷膝又傷腰。至於大掃除過後,應避免進行劇烈運動,讓身體休息,否則會更易受傷。
物理治療師建議要避免受傷,除要注意正確姿勢之外,使用適當的工具和時間的分配也很重要。「唔好一次過做晒呀,預早啲做,同分散時間清潔唔同地方,就冇咁易受傷。」