政Whats噏：財委會變小學問答比賽？　泛民鬧羅智光狗官

立法會財務委員會(財委會)到今日(17日)仍然審議緊本年度公務員薪酬調整撥款，泛民主派繼續拉布，仲瘋狂提出規程問題，又提出中止待續，務求阻撓項目中嘅警隊加薪撥款。財委會主席陳健波(波哥)為免泛民議員「亂噏當秘笈」，於是要求提出規程問題嘅泛民議員要講清楚相關會議常規編號，結果就惹來泛民批評，質疑有冇規則要求議員必須提出常規編號，直指波哥變咗小學老師，形容財委會「依家小學呀？」

早前民主黨許智峯(峯鴿)已經根據《財務委員會會議程序》提出傳召議案，討論咗10幾個鐘都未完，泛民今日就喺會上提番日前中西區區議會會議上，民政事務專員喺區議員提出譴責警方嘅臨時動議後離場嘅事，批評公務員違反政治中立。不過，政府及公務員事務局局長羅智光就力撐民政事務專員，強調離場嘅做法合適，唔認為有違反守則，重申政府唔同意區議會嘅做法同立場。

眼見泛民又乘機拉布，波哥直斥泛民又發表政見，講明冇可能無限期咁畀議員講脫離議案範疇嘅嘢，點知就惹來連串規程問題。峯鴿鬧爆波哥收窄議員言論範圍，質疑點解唔可以發表政見，波哥鬧番轉頭話峯鴿連基本規矩都唔識，仲話主席可決定議員嘅發言內容係咪同議案相關。人民力量陳志全同公民黨譚文豪都有份助攻，陳志全質疑話「依家唔係常識小學問答比賽」，譚就離開自己個位，一度被波哥要求返回座位，否則會逐離場。

公民黨楊岳橋就質疑有冇議事規則禁止議員越位，仲形容係「陳健波釋法」，要求波哥澄清。波哥回應時就話已經做咗裁決，唔能夠因為楊唔了解議事程序而解釋，仲直斥「無知唔係大晒嘛，無知應該要增進知識」，如果議員認為佢有咩做錯就歡迎用其他方法跟進。泛民攻擊波哥期間，建制派都有出手解圍，其中工聯會麥美娟就批評泛民：「你哋講嘅嘢難聽過粗口呀！」

去到會議尾聲，峯鴿突然提出中止待續，又同陳志全鬧羅智光係「狗官」，羅提出抗議要求收回言論，最終兩人願意收回言論。惟直至完會，仍未處理峯鴿嘅議案。其實議案已經傾咗十幾廿個鐘，班泛民拉布嘅手法層出不窮，一個議案已經搞成咁，嚟緊仲有40幾項議案未審議，真係開足24小時都搞唔掂，唔怪得泛民被批評為政治挾持市民嘅福祉喇！

財委會淪為小學雞爭拗，泛民中西區區議員就喺外圍助攻，今午就民政專員帶領其他政府官員離場漠視議會的行動，向申訴專員公署投訴，批評有關官員違反公務員政治中立原則。