政Whats噏：民建聯又被恥笑　直幡「和氣」變「屎味」

政黨通常都會喺街道嘅欄杆上掛滿宣傳橫額同直幡，但點知有政黨就因為單面印刷問題，搞出個「大頭佛」。民建聯今日(18日)喺街道欄杆掛上印有「一團和氣」嘅直幡，本來4個字都冇乜問題，但因為係單面印刷，從背面望過去時，字樣反轉就會睇到「和氣」兩字，變成疑似「屎味」嘅字樣。

唔少市民都喺網上嘲笑「民建聯祝你一團屎味」，而民主派亦都唔放過今次機會，將相關圖片喺網絡瘋傳。其實同類事件，民建聯已經衰過一次，之前立法會選舉嘅時候，有候選人嘅宣傳直幡印有「爭氣」兩字，從背面睇，個「氣」字亦變成疑似「屎」字，引來網民恥笑。睇嚟該黨真係要諗諗啲橫額或直幡要雙面印刷，否則好難避免同類事件發生。