政Whats噏：懲教人手流失關WiFi事　何啟明解畫

政府每10年會進行一次紀律部隊職系架構檢討，主要會檢討薪金、工時相關嘅事項。立法會勞工界議員何啟明就覺得，紀律部隊需要嘅唔單止係錢同時間，仲有手機信號呀！

何啟明今日(20日)喺立法會相關嘅事務會會議上，話部分懲教署嘅人員駐守喺偏遠嘅地區，當中包括喜靈洲等地區可能手機冇信號，令好多新入職嘅懲教署職員頂唔順，導致部門流失率偏高。佢叫大家試諗吓，「你女朋友搵你，跟住你12個鐘頭先覆機，你就死咗啦係咪先！」佢話返工時間覆唔到手機係正常，但短時間內點都需要覆機啦，仲強調呢個係男朋友嘅責任嚟㗎！

其後，佢就建議政府喺特殊環境，都需要安排基本設備，包括WiFi(無線網絡)，情況許可嘅話，最好建設流動信號發射塔添！公務員事務局局長羅智光就回應，話會考慮相關建議，希望懲教署以後會畀職員一定嘅時間去睇手機。