政Whats噏：新民黨再添丁　陳志豪新春迎鼠B

新民黨上年繼甘文鋒初為人父之後，立法會議員容海恩前幾日亦已順利誕下B女，喜訊仲接二連三，新民黨準備再添丁啦！同屬新民黨嘅香港廣西社團總會副會長陳志豪(Victor)話，大約喺大年初一(25日)，屋企就會添多個BB嘞！

Victor話大仔依家4歲啦，而嚟緊即將出世嘅BB，亦都係男仔。佢話本身打算帶老婆去威爾斯親王醫院生B，但最近武漢肺炎嘅確診者被送去威院，所以有啲擔心，依家就考慮緊轉唔轉去私家醫院生B。當問到會唔會乘勝追擊，再追番個女時，佢就話趁後生，都想追番個女，仲話根據男人嘅直覺，相信下一胎，一定會喺女嚟嘅。

有湊仔經驗，佢都打算寫育兒文章，仲連筆名都諗好，會叫做「佛系爸爸」，表明唔會畀太大壓力小朋友。而佢嘅大仔亦都將會升呢做哥哥，Victor話會進行「放養式教育」，但佢老婆就驚小朋友細細個會食壞肚，喺飲食方面反而管得好嚴喎。