政Whats噏：剪紙同建築有關係？　謝偉銓話都係要充足準備

剪紙同起樓有乜嘢關係？大纜都扯唔埋喎，但立法會建築、測量、都市規劃及園境界議員謝偉銓(Tony)就扯到佢老本行，話同建築好有關係㗎！

今日(24日)係年三十晚，Tony喺Facebook上載咗段短片，教大家中國剪紙去布置家居，增添喜慶。講到剪紙同佢嘅本行好相似，事關喺事前準備功夫要做足，包括設計、測量同規劃等，例如要預計紙張嘅大細、對摺嘅次數，仲要預先畫好圖案。

做好晒呢啲嘢之後，就要小心按照設計去剪，咁先可以將預期嘅設計展現出嚟。Tony仲即場示範，用紅紙剪咗一個圖案出嚟貼喺牆上面，又話一個簡單嘅剪紙，背後都要花咁多心思，更何況係大型嘅建築工程項目呢！

香港過去逾7個月受到修例嘅打擊，社會動盪，Tony亦有感而發，話香港嘅繁榮穩定係靠幾百萬市民嘅努力，得來不易，希望新一年香港回復平靜，經濟發展重拾升軌。