政Whats噏：產在疫情蔓延時　陳志豪再添丁

新民黨本月繼立法會議員容海恩再度「增口」後，該黨嘅香港廣西社團總會副會長陳志豪(Victor)今日(30日)再為人父，佢形容呢次係「產在疫情蔓延時」，所以特別緊張，最終太太順利誕下3.51公斤重嘅囝囝，母子平安。

公立醫院最近進入緊急狀態，醫護人手唔係好夠，Victor唔能夠陪產，而太太因為啱啱才生完BB，未落得床，所以仲未可以探佢。Victor又話今朝喺醫院睇BB，但都要隔住一道門遠望。

本身已經育有4歲大仔嘅Victor，細仔出世後，屋企又多個人，變得更熱鬧，大仔亦有個伴陪住一齊成長。早前Victor亦都話想趁後生追番個女，仲話根據男人嘅直覺，相信下一胎一定會係女嚟嘅。