政Whats噏：民政署唔派員開會　屯門區會搞山寨會議

武漢肺炎大爆發，港府宣布停課外，亦實行公務員在家工作安排。多個區議會近日都就武漢肺炎疫情召開緊急會議或特別會議，不過就正正因為公務員在家工作安排，民政事務總署就唔派員支援區議會會議，以致區議會會都開唔成。有見及此，班區議員就各出奇招，繼日前開完露天會議之後，今日(31日)就輪到屯門區議會搞「山寨式」會議，搬晒摺枱喺會議室電梯口開會，真係為咗開會，可以去到幾盡呢？

話說民主派都唔係第一次搞「山寨式」會議，早喺去年政府提出修訂《逃犯條例》，審議有關條例草案嘅法案委員會就發生「鬧雙胞」事件，民主派多次通宵留守，強行佔領會議室，仲以俗稱「大聲公」嘅揚聲器召開「山寨會議」。民主派喺今屆區議會佔逾300席，唔少都係政治素人，依家仲唔有樣學樣咩。

講番屯門區議會，今日原定開特別會議討論武漢肺炎防疫工作，不過喺開會前一日，民政署就通知議員，話因為要防疫而唔派員出席會議。班議員於是就由昨日(30日)下午開始通宵留守喺議員休息室。其實休息室空間唔大，到底班議員點開會呢？唔通要學葵青區議會咁要流落街頭？

民政署雖然最終都係冇派員開門同協助會議，不過正所謂「你有張良計，我有過牆梯」，班議員就喺休息室搬晒啲櫈，又拎晒啲摺枱，喺會議室樓層嘅電梯口開會。現場有議員做直播，區議會副主席黃丹晴就做埋區議會秘書處嗰份，負責錄音同記錄投票結果。

作為區議會主席嘅陳樹英會上就話冇指示過取消會議，仲要求秘書處要睇會議直播，公務員要在家工作，如有規程問題就會打畀秘書處。對於秘書處冇派員開會，有區議員鬧爆離譜，其中江鳳儀仲話政府冇協助區議員開會，到底點樣為居民解決困難。議員何杏梅仲直頭話應該要將秘書處獨立，咁秘書處就唔使聽命政府喎。

繼黃大仙同葵青區議會後，依家連屯門區議會都開唔成會。雖然公務員可以在家工作，但疫情來勢洶洶，相信其他區議會都希望討論。面對民生事務，政府唔通真係諗住鎖門了事？睇嚟都真係要諗吓計仔解決問題喇。