政Whats噏：政府封關防疫　珠寶業呻生意難做

為防止新冠肺炎喺社區爆發，政府早前停止多4個出入境口岸嘅運作。香港珠寶製造業廠商會榮譽主席沈運龍(Aaron)就呻話，香港難以自給自足，再全面封關嘅話，珠寶業界就唔使做生意啦！

政府講明封人流唔封貨流，點解Aaron話冇得做生意呢？原來，珠寶業買賣時要搵人帶貨，而買家落訂前亦會派專員事先去驗貨㗎，依家從內地赴港仲要隔離14日，邊有人願意嚟？佢又話好多同行嘅廠房都喺內地，但因部分關口封閉，需要換口岸運送貨物，搞到好多手續要重新辦理，浪費好多時間同金錢，有客人仲因為等唔切而要退貨，搞到佢好頭痕。

Aaron話雖然珠寶保值，但始終公司都要出糧畀員工，過去嘅示威遊行已嚴重影響珠寶業嘅營業額，依家仲要有疫情嘅陰霾，如果政府真係全面封關，珠寶行業真係唔使做啦！