近日市民到處搶購口罩，好多長者漏夜排隊都買唔到。東區區議員仇栩欣就喺社交平台上載一幅做瑜伽動作單腳企嘅相，呼籲市民捐出多餘嘅口罩，等佢可以派畀有需要嘅人。其後，灣仔區議員陳鈺琳就上載一張更高難度嘅倒立照片，疑似「挑機」喎！

仇栩欣喺Facebook上載相片，呼籲善長仁翁可以捐出多餘嘅口罩或以合理價錢轉讓畀佢，等佢可以轉贈畀有需要嘅市民。佢又話現時口罩太貴，基層難以負擔，但有網民就留言話，「附近區有人向你挑機喎」。

原來陳鈺琳同樣呼籲市民捐口罩，但就上載咗做倒立嘅相。佢貼文叫市民捐出過剩嘅口罩，做到助人自助，又話如果想捐贈口罩，搵唔到途徑，就可以搵佢幫手喎。

勸捐口罩都要搞咁多花臣，都係想多啲人關注啫！沙田區議員陳兆陽都係其中一個，佢亦轉發咗陳鈺林嘅Post，仲留言話「依家做區議員要做到咁」，話自己唔使玩啦！有網民就叫陳兆陽有樣學樣，或者考慮增加難度，做個一字馬繼續「挑機」喎。