政Whats噏：屯馬線扮偶遇　容海恩孖老公情人節放閃

今日(14日)係情人節，亦係屯馬線第一期通車嘅日子，唔少議員都爭住去「打卡」，當中就包括咗容海恩(Eunice)，佢仲要放閃添！

Eunice喺上個月下旬生咗第2個囡囡，未坐完月嘅佢早前已四出走動，今日屯馬線第一期通車，佢亦親身走咗去體驗吓，仲拍咗段短片上載Facebook，喺片中仲預告要睇到片尾，事關有彩蛋。乜嘢嚟？

佢先由啟德站搭去顯徑站，落咗車之後周圍睇吓站內嘅設施，做咗媽媽當然好在意站內育嬰室嘅設施啱唔啱用啦，又試過室內張坐椅，話抱住BB喺左邊餵到奶，右邊又餵到，睇嚟都相當滿意。

去到片尾，Eunice拍卡出閘，喺呢個時候，遠處見到一個似曾相識嘅身影。係邊個？再行近啲睇，一個「口罩男」拎住支玫瑰花。估到嘞啩！跟住個口罩男送咗支玫瑰花畀Eunice，唔使估嘞！毫無懸念，咪就係佢老公、新民黨前政策總裁袁彌昌囉。原來兩公婆夾埋扮偶遇，喺港鐵度邂逅放閃！