政Whats噏：疫情影響　謝偉銓靠視像會議做評審

新冠肺炎疫情肆虐，唔少活動都取消或改期，好多機構仲實行在家工作制添。依家有學校都轉用視像會議形式上堂，而建築、測量、都市規劃及園境界議員謝偉銓都有樣學樣用視像會議，不過就唔係上堂，而係為設計比賽進行評審工作。

個設計比賽係由深圳市前海深港現代服務業合作區管理局主辦，係一個青年建築設計比賽，都有百幾人參與。至於評審方面，一共有9位來自香港同深圳嘅專家。

不過話時話，依家疫情咁嚴峻，從內地入境香港嘅人士都要強制隔離，而且內地多個城市仲做埋封關添，咁搞法個比賽都唔知點做評審。負責統籌嘅謝偉銓，就同班評審一齊做視像會議，大家隔空咁睇住啲資料同模型做評審，最終都順利揀選到作品。依家疫情唔知爆發到幾時，睇嚟其他比賽或活動都可能要參考一下，用視像會議形式進行喇！