政Whats噏:鉛水風波主角林天星 任西九委員會成員

20200218
東網電視
更多新聞短片
林天星獲委任做西九文化區發展委員會嘅增選成員。
退休高官唔愁無出路!政府近年最鍾意委任前高官出任公職,覺得佢哋經驗豐富唔好嘥,但西九文化區管理局董事局今日(18日)就公布,委任喺2015年爆出公共屋邨鉛水風波醜聞嘅主角、水務署前署長林天星做發展委員會嘅增選成員。
林當年被獨立調查報告批評「專業不足」同「固執己見」,但就堅拒問責落台,後來仲「全身而退」攞埋長俸退休,去年更獲委任做海洋公園董事,不過佢上任唔夠1年,海洋公園就因新冠肺炎疫情嚴峻而暫停開放,認真「唔老黎」。今次林加入西九嘅發展委員會,唔知會唔會繼續陀衰家呢?
西九文化區管理局董事局今日公布委任轄下委員會成員名單,其中發展委員會有兩名新成員,分別係發展局前局長馬紹祥同林天星,任期由本月3日至今年12月31日。
管理局董事局主席話,相信憑住新成員喺唔同範疇嘅經驗同專業知識,西九文化區就會發展成世界首屈一指嘅綜合藝術文化樞紐。講到專業,佢就曾被食水含鉛超標調查委員會報告批評係「專業不足」喎!
2017年底退休嘅林天星喺擔任水務署署長嘅4年期間,爆出公共屋邨食水含鉛事件,調查報告唔止批評一眾持份者集體失職,更炮轟林喺水質科學方面嘅專業知識不足,而且一意孤行,無採取較佳嘅水質取樣方法。雖然事後好多聲音要求涉事官員下台,但林僅就事件道歉,未有請辭。時任政務司司長林鄭月娥就話,睇唔到有個別官員要就鉛水事件負責,仲讚林天星喺任內提升咗食水安全,成件事認真諷刺。
西九文化區工程超支嚴重,被形容係無底深潭,更有地盤出現構築物傾斜同水浸迹象,林天星當年鉛水事件搞到一鑊泡,去到海洋公園做董事又咁啱撞正疫情要閉園,今次佢主力參與西九文化區嘅發展事務,真係唔知嚟緊會變成點嘞!