政Whats噏：新冠肺炎疫情下開會　高官議員唔戴罩

立法會今日(19日)就新冠肺炎進行緊急質詢，而秘書處早前都有指引，強烈呼籲所有出席會議嘅人士佩戴口罩，但點知唔少出席嘅官員同議員就齊齊「唔戴罩」，依家疫情咁嚴重，唔通佢哋真係唔驚？

冇戴口罩嘅官員包括運輸及房屋局局長陳帆、商務及經濟發展局局長邱騰華同政制及內地事務局局長聶德權，仲有唔少建制派議員，好似何君堯、黃國健、郭偉強、張華峰、廖長江、郭偉強及蔣麗芸等，都好似約好咗咁一齊唔戴口罩出席會議，就連話生產防菌布口罩嘅鍾國斌都冇戴！

葛珮帆本身就有戴住，但點知後尾戴戴吓又除低咗，唔知係未嫌太焗？而郭榮鏗就成為全場唯一一個唔戴口罩嘅泛民議員。疫情咁嚴重，大家都小心翼翼做足防護措施，但一批官員同議員就似乎唔太驚嘞。