政Whats噏：立會防疫工作做足　陳健波籲議員加開財會

新冠肺炎疫情持續，重創香港經濟，各行各業都大受打擊。立法會財務委員會主席陳健波(波哥)提議情況安全之下，喺3月6日同3月13日加開財委會會議，盡快處理積壓已久嘅民生撥款，開水喉救社會。佢之前仲喺Facebook叫網友畀意見，當中有95%嘅網友支持盡快開財委會。波哥話加開會議同盡快通過公務員加薪議案無關，又話開會交叉感染風險唔大。

波哥解釋，本身3月頭兩個星期係北京兩會嘅時間，?家兩會延後，議會亦有時間開會。波哥向同事發電郵睇吓佢哋想唔想開會，如果有30人都表示可以開先再開，不過都要視乎當時疫情有無惡化嘅。

有人可能會擔心多人聚集會增加傳染風險，波哥話好多感染個案都係食飯或聚餐，喺無戴口罩嘅情況下傳染。佢指立法會防疫工作做足，入去大樓要量體溫，觀眾數量又有限制，議員開會都會戴口罩，加上大家座位隔得遠，基本上風險唔大嘅，波哥講笑話除非有人衝出嚟嘅啫！