政Whats噏：開會唔係打情罵俏　何君堯話唔使戴罩

立法會工務小組今早(26日)開會，唔少委員都戴上口罩，但何君堯似乎唔驚，冇戴口罩開會，完會後問返佢做乜唔戴罩呢？佢隨即喺記事簿攞咗個新口罩出嚟戴，解釋話唔係唔戴，不過評估過入面環境安全，又話開會唔係同人打情罵俏，隔離左右平均都有2米距離，咁啱隔離又冇議員坐，認為唔需要戴咁話。

何仲講，就算有人坐喺隔離都會問對方有冇咳或傷風之類病徵，如果連佢哋都質疑有病咪戴囉。何絕對認同疫情中要有保障措施，但又唔可以過份擔心，話冇得驚咁多嘅，仲反問若果返到屋企見到老婆、食飯、瞓覺，又使唔使戴罩同埋分房瞓呢？所以話每個環境要評估喎。

財政司司長宣讀新一份財政預算案時，有唔少官員及議員齊齊「唔帶罩」，當中包括勞工及福利局局長羅致光、環境局局長黃錦星、運輸及房屋局局長陳帆、發展局局長黃偉綸，就連宣讀預算案嘅財政司司長陳茂波都冇戴添！議員方面就有廖長江、葉劉淑儀、邵家輝、郭榮鏗、蔣麗芸、黃國健等都冇戴。